A Xunta presenta no diálogo social medidas de todas as consellerías para paliar os efectos da crise nos distintos sectores

O proceso de diálogo social é unha aposta do actual executivo da Xunta de Galicia por establecer un proceso de concertación en prol do desenvolvemento social e económico da nosa Comunidade Autónoma, co obxectivo de recuperar a senda de crecemento da economía real e mellorar os niveis de benestar e cohesión social de Galicia. O seu fin é tamén dar resposta ao cambio de coxuntura económica, traballando na creación de emprego e en frear a súa destrucción, favorecendo a competitividade e productividade dos diferentes sectores, clave do noso tecido produtivo. En definitiva, trátase de establecer de xeito coordinado plans e políticas de actuación que redunden na mellora da situación dos galegos e galegas.

Así, ao longo desta semana reuníronse os responsables da mesa de emprego e relacións laborais; de competitividade empresarial e innovación; e de infraestruturas e desenvolvemento sostible, estando prevista para a próxima semana a mesa de políticas de benestar e cohesión social. En todas elas, presentouse unha batería de medidas que implican aos distintos departamentos e que benefician aos distintos sectores e colectivos, establecendo prioridades temáticas para abordar nas seguintes mesas cun documento específico sobre cada unha das áreas a tratar.

No caso de emprego e relacións laborais, os eixos básicos de traballo pasan polo fomento das políticas activas de emprego, pola conciliación da vida laboral e familiar, así como o ámbito das relacións laborais, sen esquecer –entre outros temas- a prevención de riscos laborais, ou a igualdade entre homes e mulleres.

Polo que se refire á competitividade empresarial e innovación, as principais liñas de traballo que propuxo a Administración autonómica son o desenvolvemento do tecido empresarial, as liñas de financiamento ou a disposición do solo industrial. A isto súmaselle o interese pola internacionalización, simplificación administrativa e aposta polo I+D+I, entre outros eixos de traballo.

Por outra parte, na mesa de infraestruturas e desenvolvemento sostible, púxose enriba da mesa como asuntos principais o desenvolvemento de infraestruturas, mobilidade, ordenación e articulación territorial e a vivenda.

Por último, na última mesa, que abrangue os temas de benestar social, estudaranse medidas relacionadas coa inclusión e a protección social, a educación, a sanidade e a dependencia.

En concreto, abordaranse accións de impulso da atención á dependencia, a protección dos menores, medidas de apoio aos mozos e mozas galegos ou a inclusión social de colectivos en situación de grave pobreza.