A variación interanual do IPC sitúase no mes de xaneiro en Galicia no 1,2%

A variación interanual do Índice de Prezos ao Consumo (IPC) en Galicia situouse no 1,2% no pasado mes de xaneiro. Con este rexistro, o nivel de prezos respecto do exercicio anterior situouse dúas décimas por riba da media do conxunto de España (1,0%). Así o reflicten os datos feitos públicos hoxe polo Instituto Nacional de Estadística (INE), que recollen que o IPC descendeu o pasado mes un – 1,4%, catro décimas máis que no conxunto do Estado (-1,0%).

Na evolución por capítulos, os grupos que tiveron un comportamento menos inflacionista en xaneiro foron ‘Vestido e calzado’ (- 14,8%), ‘Ocio e Cultura’ onde os prezos decreceron un – 1,7% e ‘Enxoval’ (- 1,2%). Por outra banda, o grupo cunha maior suba dos prezos foi o de ‘Transporte’ (1,7%).

Na evolución interanual, os grupos que rexistraron unha maior caída do IPC foron ‘Alimentos e bebidas non alcohólicas’ (- 2,1%); ‘Ocio e Cultura’ (- 1,6%), e ‘Vestido e Calzado’ (- 1,1%). Pola contra, os grupos que presentan unha maior suba son ‘Bebidas alcohólicas e tabaco’ (10,6%) e ‘Transporte’ (6,5%).

Índices provinciais

En relación cos índices provinciais, en termos intermensuais todas as provincias galegas mostran unha baixada dos prezos, sendo máis acusada en Lugo (- 1,7%) e Pontevedra (- 1,6%). No que a variación interanual se refire, A Coruña é a provincia que mostra un maior incremento dos prezos cun 1,2%.