A consellería do Mar reunirase cos bateeiros e confrarías a petición do sector para ampliar a información sobre os cambios nas análises das biotoxinas mariñas

Técnicos do INTECMAR xunto con outros representantes da Consellería do Mar, manterán un encontro cos bateeiros logo de que os representantes do sector así llo solicitaran. Os mexilloeiros trasladaron á Dirección xeral de Competitividade e Innovación a súa preocupación sobre a proposta da Comisión Europea respecto do cambio de método analítico de control e do cambio dos niveis de referencia de presencia e biotoxinas mariñas en moluscos bivalvos.

Logo da reunión organizada polo Consello Regulador da Denominación de Orixe do Mexillón de Galicia o pasado venres 21 de xaneiro en Vilagarcía na que se tratou o tema cun representante da Comisión Europea e coa directora do Laboratorio Comunitario de Referencia en Biotoxinas Mariñas, o sector demanda esta reunión ante a “confusión que reina” e a falla de claridade sobre o mesmo. Os bateeiros solicitan un encontro cos responsables da Consellería do Mar, que non asistiron á reunión mantida en Vilagarcía ao non ser convocados.

Membros do sector bateeiro amosaron a súa preocupación tras coñecer no devandito encontro, celebrado o pasado día 21, a postura da Comisión Europea e as súas pretensións sobre o método analítico de control e os niveis de biotoxinas ao non considerala clarificadora. 

A Consellería do Mar convocará nos vindeiros días aos membros do sector a unha reunión na que estarán presentes diversos técnicos do INTECMAR para explicar a visión da Xunta sobre o tema e aos que poderán expor as súas preocupacións.