O delegado da Xunta de Galicia en Buenos Aires presenta en Villa Gesell a exposición 'Miradas no Camiño de Santiago'

O Delegado da Xunta de Galicia en Buenos Aires, Alejandro López Dobarro, presentou este xoves na localidade bonaerense de Villa Gesell a exposición “Olladas no Camiño de Santiago. Xacobeo 2010”.

O acto de presentación oficial da mostra tivo lugar no Santuario Apóstolo de Villa Gesell coa participación de membros da Confraría de Santiago Apóstolo e do Club Español, entre o público asistente.

López Dobarro expresou a súa satisfacción por concorrer por segunda vez a esta localidade convidado para celebracións relacionadas coa colectividade galega, logo da súa designación como Hóspede de Honor o pasado mes de outubro. Neste sentido, asegurou que esta mostra percorrerá diversos puntos da xeografía arxentina pero existía o “compromiso” de comezar por Villa Gesell, onde existe un vínculo tan marcado con Compostela. Así, asegurou que “Santiago é un punto de unión, esteamos onde esteamos, e que nos convida ao camiño a procurar as nosas metas”.

O Delegado da Xunta de Galicia en Buenos Aires agradeceu ao público asistente a súa participación neste acto de presentación e anunciou que a partir da semana próxima tamén poderá verse parte da mostra na Casa da Cultura de Villa Gesell.

Olladas no Camiño de Santiago

Olladas no Camiño de Santiago é unha exposición fotográfica organizada pola Xunta de Galicia para difundir en Arxentina o Xacobeo 2010 e as características e o sentido da peregrinaxe a Compostela. En total, son 70 imaxes de seis fotógrafos galegos-Delmi Álvarez, Fernando Bellas, Tino Martínez, Javier Teniente, Xullo Villariño e Tino Viz - que narran o espírito, as personaxes e as paisaxes do Primeiro Itinerario Cultural Europeo.

Villa Gesell é o primeiro punto do percorrido que levará esta exposición por toda a xeografía arxentina, logo de que o presidente da Xunta de Galicia, Alberto Núñez Feijóo, inaugurase a mostra no Pavillón das Bellas Artes da Universidade Católica, na Cidade Autónoma de Buenos Aires no mes de decembro de 2009.