Espacio Atlántico destina o 15% da recadación por venda de entradas á Fundación IgualArte

A dirección de Espacio Atlántico donará o 15% da recaudación procedente da venda de entradas a unha organización benéfica viguesa, a Fundación IgualArte. Esta entidade, nacida en 2002, ten como obxectivo promover o desenvolvemento individual de persoas con discapacidades a través da arte, unha importante tarefa na que Espacio Atlántico quere implicarse.

IgualArte ofrece un espazo activo e integrador destinado a fomentar a creatividade. Para isto organiza numerosas actividades artísticas lúdicas e de aprendizaxe, potenciando o benestar persoal con necesidades educativas especiais. Todo isto vehicúlase a través da música, a plástica, a expresión corporal e teatral ou o baile, empregando os recursos dispoñibles na súa Fundación. Tamén iniciou unha liña de investigación de métodos e adaptacións curriculares en educación musical e artística para persoas con necesidades educativas especiais.
Un espírito que recolle plenamente Espacio Atlántico, que nesta edición se presenta baixo o eslogan “Ven escoitar o que os teus ollos queren contarche”, na procura de universalizar a arte, nunha invitación a gozar das obras que participarán alí con todos os sentidos, a escoitar coa mirada cando as palabras quedan cortas.

Espacio Atlántico Vigo 2010 
    
Na próxima edición da feira de arte contemporánea de Vigo, entre o 14 e o 17 de xaneiro de 2010, participarán un total de 53 galerías, unha selección que se fixo pública o 3 de decembro, entre as que están algunhas das galerías máis destacadas de España y Portugal. A estes 53 participantes haberá que sumar os que exporán nos ‘projects’, nos que se presenta a obra dun único artista, aínda que a súa selección non se fixo pública polo momento. Espacio Atlántico, baixo a dirección de Marta Scarpellini e coa dirección artística de David Barro, sitúase como a principal referencia feiral do noroeste peninsular.

A feira Espacio Atlántico está patrocinada polo Concello de Vigo, a Xunta de Galicia, a Obra Social Caixanova e o Ministerio de Cultura.